My Photo
Name:
Location: Egypt

Friday, May 26, 2006

طيـــــــــــــــــاره فوق.. طيـــــــــــــــــــاره تحت



قبل البدء في الهبوط بذاتي هنا
كان علىّ أن أتأكد من ربط الأحزمة..
والآن.. أعلن الوصول

في الأول اترددت اني أحفر في الحاجات اللي بتسعدني
لأن بالنسبه لي دي ممكن تقلب المواجع (قال يعني هي مش متقلبه)
بعد تقلص مساحات التقاطع والملامسة مع أشباه لي من البشر في الحياة اليومية،
سواء في الشغل أو في أي مكان آخر..

في الآخر قررت أرمي نفسي من الطياره..
"معلش اتأخرت"

بتبسطني ريحة القهوة وأنا ماشية في شارع مستعجلة وبمد، الريحة اللي بتخليني أمشي أبطأ علشان أطول المدة اللي ممكن أشمها فيه.

لو رحت الشغل بدري وقعدت في سيلانترو وهو فاضي الساعة 8:30 والجو فيه لسعة برد وطلّة شمس.

لو جبت لعبة وعرفت أقعد ألعب بيها منغير ما "حد كبير" ييجي ويقلب الموود.

صوت فيروز

طعم السيجارة في المطر

ريحة الزرع

ملمس دقنه وهي منبته

لو حسيت ان حد بيحبني من بعيد لبعيد

أي حاجة ممكن تتوصف إنها "أورجازميك"، مزيكة "بينك فلويد" لما بحس إني جواها وبعلى معاها لحد الأورجازم

لما بعمل تصميم وبستغرق فيه لدرجة إني مش بحس باللي حواليه ولما يخلص وأحس بالأورجازم

البيرة على البحر وتكون متللللللجه.. أورجازم!

أكلة سمك في اسكندرية.... دومينو وشيشة وضحك لما قلبي يقف وبعد شوية سيجارة على البحر وأروّح

لما أسوق عربية سبور... صوت الموتور بيجنني..

السينما بالذات وهي فاضية

لما أفابل بالصدفة حد ينفع يبقى صاحبي في مكان مش متوقعة اقابل فيه حد كده

تحضير شنطة السفر، المطار، الترانزيت في بلد ماعرفش لغتها، أول نسمة هوا برة المطار في بلد أول مرة أزورها

كسر المسموح علناً.... الحرية.... يا سلام لو عرفت أمشي عريانه في الشارع!

طريق سفر بالليل في العربية ومزيكا حلوة سواء لوحدي أو مع حد بحبه

قلبي بيهفهف لما أسمع حاجات كتير ورا بعض لوردة وبليغ حمدي.... ده بقي أورجازم دوبل

صحرا في سيناء... شمع.... النجوم ظاهره قوي... أنا وحد بحبه نايمين على ضهرنا وبنغني

لو عرفت بنت وقدرنا نستمر في صداقة

لما حد بيقوللي روحك فيها كتير من سعاد حسني... ممكن أبوسه.

لو في يوم من الأيام حد حبني من غير ما يطلب عقد ملكية..

لو عرفت أتعامل مع الجنس على إنه من حقي..

بفرح لما بحس إن في مرايات حوالية من وشوش الناس أقدر أشوف فيها نفسي

بس خلاص

36 Comments:

Blogger Ahmed Rashwan said...

حمد الله على السلامة
بس كنتي لازم تدينا خبر علشان نفضي المطار
سيلانترو رائع صباحا بس مش الزمالك علشان خنقة منع التدخين
صوت فيروز وبخاصة لو كانت تغني صباح ومسا ، أتقطع أنا
الأورجازم في كل تفاصيل الحياة كما في الجنس ،موافق بشدة
البيرة المتلجة تكون ستيلا والزجاجة تكون مبللة علشان أخلع الليبل وأكتب عليه كلمات لصحابي اللي معايا
أكلة سمك في إسكندرية ياريت عند أبو أشرف
الترانزيت في بلد متعرفيش لغتها بس ياريت ميكونش في براغ
أنتي فعلا روحك فيها من سعادحسني وده واضح من خلال كتاباتك
ليلةالشمع في المسبط في دهب الله يرحمها
طبعا الحرية حق والجنس حق بس إزاي نعرف نتعامل مع الحق ده علشان محدش يسلبه مننا
كل الحاجات دي بتحبيها ومكتئبة طول
الوقت ، مش موافق
بس مش مستغرب

Friday, May 26, 2006 7:09:00 PM  
Blogger 3arousa 7alawa said...

film69
واضح إن حد بلغك معاد وصولي لأنك استقبلتني بسرعة جداً
سيلانترو المعادي.. بره على الرصيف
صباح ومسا جميييييييله وكمان شو بخاف بتلمسني قوي
انت كمان بتخلع الليبل بتاع البيرة بس أنا بحب مايستر أكتر؟؟؟؟
أبو أشرف أسمع عنه كتير لكن عمري ما رحت
براغ ماعرفش... أمستردام ممكن
أنا فعلاً روحي فيها من سعاد حسني؟ شكلك طمعان في البوسة :)
المسبط في دهب زمااااااااااااان يعني من ييجي 10 سنين كده
إزاي نعرف نتعامل معى الحق في الحرية والجنس منغير ما يحصل صدام مع الآخرين؟
أنا مكتئبه علشان في دايرة الناس اللي بتحرك في وسطهم ما فيش مرايات أشوف فيها وشي

Friday, May 26, 2006 7:40:00 PM  
Blogger Gemyhood said...

كانت رحلة جامدة الله ينور على قلمك :d

Saturday, May 27, 2006 12:45:00 AM  
Blogger Ahmed Rashwan said...

صدقيني محدش بلغني ولا حاجة ، أنا وصلت في الميعاد صدفة وده
Sign
ساين بديع ، بتؤمني بالساينز مش كده
لازم طبعا تتعرفي على أبو أشرف ، وعلى أشرف أبنه كمان!!:)))
يبقى أبو أشرف الطلعة الجاية
طبعا طمعان بس صدقيني ما بأعرفش أجامل
موضوع التعامل مع الحق في الحرية والجنس طويل شوية مش حيخلص في كلمتين خليه مؤجلات
بالنسبة للمراية ، غيري الدايرة أو غيري البرجل وساعتها طبيعي حيبقى فيه مراية بجد

Saturday, May 27, 2006 4:13:00 AM  
Blogger 3arousa 7alawa said...

أنا أومن بالــساينز جداً وده مرهق لأنها ساعات بتمرجحني
لسه حد مكلمني على أبو أشرف وابنه اللي اسمه الحقيقي حبّي
عندك حق في موضوع تغيير البرجل لأنه ابتدى يصدي وده من علامات الساعة
بجد بجد نورت المدونه

Saturday, May 27, 2006 12:36:00 PM  
Blogger 3arousa 7alawa said...

Mr.GEMYHOoOD
نورتني وميرسي على الدعوة دي

Saturday, May 27, 2006 12:37:00 PM  
Anonymous Anonymous said...

حلوة قوي
قوي قوي كمان
بس مش عارف ليه قلبي وجعني
كان قلبي حاسس إنك بعد البوست اللي فات، ح تعملي مصيبة
وأديكي عملتيها
مش عارف إذا كنت قلبتي علي المواجع
ولا الملذات
بس عارف إن قلبي في اللحظة دي
بينهشه الحنين
ولو في لحظة سكر مبين
البحر قبل يا خدني في حضنه الوسيع
يمكن الإزازة على الشط تحكي لعابر سبيل
قد ايه كنت بأحبها

Saturday, May 27, 2006 4:25:00 PM  
Blogger 3arousa 7alawa said...

يااااه يا أدوناي
انت اللي قلبت علي الحنين

Saturday, May 27, 2006 5:57:00 PM  
Anonymous Anonymous said...

طوبى لمن شرب فسكر
فمدد جسدا عاريا غمرته الأمواج
واستنشق عبق اليود في ثنايا معشوقته
ورشف ملوحة البحر من نحرها
ثم مات
قبل أن تنهش قلبه الذكريات

Sunday, May 28, 2006 3:10:00 PM  
Blogger The Eyewitness said...

أجراء قائمة قراءتها حتىة الأن.

Sunday, May 28, 2006 6:28:00 PM  
Blogger شغف said...

اممممممممم

فكرتيني قوي بشخصية كاتبة روائية في رواية نوال السعداوي " الرواية " ، كانت برضة أول ما تنهي الرواية اللي بتكتبها - بوصف زوجها - كانت بتدخل تاخد شاور وهي بتغني ، وكأنها وصلت لقمة الأورجازم أثناء ممارسة الكتابة

أنا متخيلة معنى الكلام ده ، وان كنت مش عارفة ان كان مشابه للاستثارة الرائعة اللي بتحصل في مخ الواحد وهو بيكتب بانغماس وحماس ومتعة ، او بيقرا حاجة بنفس التمتع ده ، ولا الاحساس ده حاجة تانية؟

عموما ، وعلى الرغم من
عدم تفسير نقاط معينة
زي النقاط التي تختص بممارسة بعض الحقوق

لان نوعية الممارسة هو اللي بيدي معنى كون هذا الشيء او ذاك حقا ام لا

لكني استمتعت بقراية أشياءك التي تسعدك

Sunday, May 28, 2006 7:50:00 PM  
Blogger Alexandra said...

خليتيني عايزة اقرا تاني الحاجات الي انت كاتباها واكتب حاجاتي تاني. أورجازميك وصف بستعمله كتير :))

مش عارفة بقى سعاد حسني ولا مين بس انا حبيت روحك يا شيخة

Tuesday, May 30, 2006 9:03:00 AM  
Blogger 3arousa 7alawa said...

The Eyewitness: أشكرك كثيراً

sha3'af: لست من هواة التصنيف خصوصاً ما يتعلق بالأحاسيس لكن بالنسبة إلي الانغماس في فعل شيء أحبه هو قمة المتعة واللذة
لست أفهم كيف لي أن "أفسّر" ما أعني بممارسة الحقوق مع حفظ حقي بعدم الاتفاق معك في كون نوع الممارسة هو اللذي يحدد إذا كان هذا الشيء حقاً لي أم لا حيث أرى أن مرجعيتي في ممارسة ما أرى حقاً لي هي ذاتي فقط

سعيدة أني أمتعتك

Alexandra: تعرفي إن أنا كمان كل لما بقرا حاجات ناس معينه وانت منهم بحس إن الحياه حلوه قوي وإني ناسيه حاجات كتير بتمتعني وأفكر أكتب حاجاتي تاني؟ احنا كنا بعيد عن ذواتنا واللا إيه؟
أنا قريت فعلاً إنك بتستخدمي كلمة "أورجازميك" ولقيت التعبير ده عندك في وصف الكريم كراميل حقيقي اتخضيت!!!!! أنا كمان بحب روحك ومدمنه لكتابتك :))))))

Wednesday, May 31, 2006 12:55:00 PM  
Blogger identité sans essence said...

كأنني انا التي كتبت هذه الطيارة

Saturday, June 03, 2006 12:49:00 AM  
Blogger إبراهيم السيد said...

enough comments ... ig uess no more words to say:)
bas begad elmoshkela in 7ata m3 el7agat di kolha elwa7ed lessa bardo makhnooo2 awy,

mosh 3aref

Sunday, June 04, 2006 1:41:00 AM  
Blogger 3arousa 7alawa said...

سلاف عباس:
أشكرك كثيراً على استضافة الطياره وسعيده جداً باكتشافك واكتشاف أن المسافات لا تعني بالضرورة البعد

سَيد العارفين:
يا أخي خللي الناس تفضفض
الواحد لسه مخنوق.... أتفق معك
بس أهي "تفريجة" على رأي http://seainsideme.blogspot.com/

Sunday, June 04, 2006 8:44:00 AM  
Blogger حـدوتـة said...

لأ يا جماعة...الأوجازميك بجد البيري بروليه في رترو في المهندسين

أنا برضه بحب العب من غير ما حد كبير يجي يفركشلي اللعبة

دي الحياة حلوة بجد يا جماعة :)

عروسة...لازم نروح اسكندرية سوا :)

Wednesday, June 21, 2006 11:11:00 AM  
Blogger 3arousa 7alawa said...

حدوته.... رترو جميل بس لما يكون فاضي وده نادر جداً... أوعدك قريب هقوللك رأيي في البيري بروليه

نروح اسكندريه.... ياللا!!!!

Wednesday, June 21, 2006 12:15:00 PM  
Blogger Mamdouh Dorrah said...

ابعد بعيد..
و اغزل خيوط العنكبوت كونك..و إياك تموت
و سجل إنك مصطبر ع الصبر..
الذكريات المؤلمة جاية و شايالك تابوت..
تحت الضغوط
ممكن تعافرالانكسار..
ممكن تقلد الصمود
الأخطبوط..
الحزن الفارد دراعاته الكتير..
متربصين بالصمت فيك
و دافعينك للفرار
خلي فرارك القرار ..و إياك تموت
كل الخطوط ...
خايفة تكون مكتوبة فيك
خايفة تغرق نفسها ف وهم و سراب
و الإغتراب ..
مخلوق هوايته انهيارك
عايز يصاحبك بس مستني انكسارك..
---------------------------
كل أحلامك مصيرها المقصلة..
و المشكلة إنك برئ
حتي في حلمك باكتمال روحك برئ
حتي في لحظة انكسار نفسك برئ
مين المعذب في الوجود؟
مين اللي مذنب؟
الجرئ و الا الطريق؟
و الا اكتمال حلمك في حضن مخدتك ... ممنوع
--------------------------------
رغم كل الجميل اللي أولتيه
إلا ان اسكندرية أجمل من كده بكتير

Sunday, June 25, 2006 2:05:00 PM  
Anonymous Anonymous said...

طعم السيجارة في المطر

Wednesday, June 28, 2006 9:51:00 PM  
Anonymous Anonymous said...

read and share top secrets
it might be a good idea
go to
www.fadfadfree.blogspot.com

Tuesday, July 04, 2006 3:36:00 AM  
Blogger خوليو said...

ريحة القهوة صدفة , وصوت وردة لما ييجى صدفة, وطعم السيجارة فى المطر , والعرى فى الشارع
الظاهر انى فيا من روح رشدى اباظة شوية؟
.
.
مش طمعان فى بوسة
انا بوست سعاد حسنى من زمان

Thursday, July 06, 2006 5:42:00 AM  
Blogger أُكتب بالرصاص said...

روحك فيها كتير من سعاد حسني

Monday, July 17, 2006 9:29:00 AM  
Blogger ayman_elgendy said...

بس خلاص....؟؟

عين ناعسة

رياح شديدة

قلم رصاص

و.....سيجارة مشتعلة

والبحر يرغي ويزبد

تدوينة حلوة

مودتي

Thursday, July 27, 2006 11:11:00 PM  
Blogger محمد أبو الفتوح said...

إيه الجمال ده
خليتى جسمى يقشعر مع كل موقف أورجازم
أنا بفرح لما أكون ف مكان دفا و بشرب حاجه دافيه و النيا بره بتمطر
و بفرح لما أمشى بشويش تحت المطر و بفرح لما ألمح أول نظرة حب ف عيون أى حد
ياريت تشرفينى على مدونتى

Friday, August 11, 2006 8:34:00 PM  
Blogger عمر said...

بصراحه كلامك فكرنى بسكندريه فى الشتا بعد الساعه 12 بالليل بهد حفله السنما .شكرا

Monday, August 28, 2006 1:04:00 PM  
Blogger مـهـا said...

ايه بس يا عروسة، انتي مختفية فيين، وحشتيني، عايزة اقرالك حاجة بقى

Tuesday, September 19, 2006 11:25:00 PM  
Blogger 3arousa 7alawa said...

أنا مش عارفه أنا فين! حالة اكتئابية من نوع فريد..... وحشني التدوين ووحشوني الآخرين

Thursday, September 21, 2006 4:31:00 PM  
Blogger خوليو said...

انتى واحشانى جدا

بمناسبة انك واحشانى جدا

وبمناسبة انى قفشتك دلوقت

:)

روقى

Friday, October 06, 2006 10:43:00 PM  
Blogger خوليو said...

تعالى

Wednesday, October 11, 2006 12:38:00 AM  
Anonymous Anonymous said...

الصورة تخيفك ؟

Thursday, October 19, 2006 2:45:00 AM  
Blogger خوليو said...

هابى نيو عيد :)

Tuesday, October 24, 2006 5:19:00 AM  
Blogger Dmo3 Al Kohl said...

بفرح لما بحس إن في مرايات حوالية من وشوش الناس أقدر أشوف فيها نفسي

معقول

Wednesday, October 25, 2006 10:40:00 PM  
Blogger lastknight said...

شغف حقيقى للحياه .. حقيقة الحياه هى عند الحد الأقصى من كل شىء .. المتعه و الألم .. اليقين و الشك .. الحد الفاصل بين الحياه الأبديه .. و الحياه فى التوابيت
رائع .. بسرعه قادنى موضوعك لأراجع صخب البحيره لمحمد البساطى .. و أعيش مره أخرى الصراع بين أهل الأرض و الطين .. و أهل البحر و السماء .. و أظنك من أهل البحر و السماء .. و لأن دمى تقيل .. و لا أحتمل السعاده لفتره طويله .. وجدتنى أراجع جمال حمدان ..صراع الملاح و الفلاح ..فى استراتيجية الأستعمار و التحرير
لا تعليق ألا أن موضوعك كأنه بعث الروح فى مشاعرى و ذهنى مره أخرى .. و أعادنى بقوه لقواعد الزمن الجميل

Friday, November 10, 2006 12:48:00 PM  
Blogger ذات الوشاح said...

أهههههههه طويلة و متنوعه النغمات
، أنا أكتشفت المزيكا الاورجازميك فى الاغانى الشرقية ، جرى جفنة علم الغزل للحجار

و أمواج البحر الداعرة فى الساحل لم تقعد تخبط فى الجسد بجرأة تحسد عليها ، الشيكولاته بالويسكى ، و أى أكل مشوى على الخشب فى الصحراء فى اليل

من الرائع أشتهاء الحياة و التدحرج من ذروة إلى أخرى


و لكنى لا أجروأ على تجاهل متعة الجسد ملتصقا بالجسد يدوان فى مدار خاص ،

تختلط فى كل الابعاد

Saturday, August 18, 2007 8:29:00 AM  
Blogger 3arousa 7alawa said...

والواين في ليله شتا جنب دفاية والدنيا بتمطر برّه

وحضن ماما لما تبقى واحشاني بجد

والزيوت الإكزوتيك في المساج

كل ذروة مختلفة عن الأخرى في المستوى والعمق

Wednesday, August 22, 2007 3:09:00 PM  

Post a Comment

<< Home